今個星期六上午11點，唔少政商界中人將會雲集堅道主教座堂，見證民主黨創黨主席「馬丁」李柱銘囝囝李祖詒（Joseph），同莎莎老闆郭少明嘅細女郭詩雅（Kitty）拉埋天窗，八方早前都講過，馬、莎兩家人對呢宗婚事都相當低調，唔多想公開咁噃，政圈只知除咗喺6月2日香港行禮外，6月中則會喺新加坡擺喜酒，啱啱撞正「特金會」，唔少獲邀出席人士都希望唔好有封路等情況影響出入。
而低調辦婚事嘅呢對新人，婚照終於曝光嘞！八方有朋友收到女家嘅金色囍帖，當中可見有個相信代表新人英文名字頭嘅K字同J字，交纏在一起，當中亦唔少得Joseph同Kitty喺樹林光影中嘅甜蜜婚照，就咁睇相都見佢哋甜到漏。
女家籲將賀禮捐公益金
而原來女家派發嘅喜帖中，附有一張100蚊嘅美心餅卡禮券以及回禮利是100蚊，女家仲呼籲親朋戚友，若有賀禮，可以捐去公益金，實行寓辦喜事兼做善事。
李八方