近年國際球壇最慘慘豬球隊，由15年起連續三年都喺國際大賽決賽屈居亞軍嘅阿根廷，喺周二展開世盃決賽周前熱身賽。話阿根廷要靠晒美斯冇乜人反對，周二呢場熱身賽，阿根廷主場4:0輕取海地，正選上陣嘅美斯大演帽子戲法兼交一次助攻埋齋，四球波全部有份。美斯再入三球之後，喺南美球員累積國家隊入球數字已經超越「大哨」朗拿度上第二位，只係喺球王比利一人之下。（見附表）
阿根廷喺布宜諾斯艾利斯主場出擊，開波17分鐘就由美斯主射12碼先開紀錄。易邊後，美斯喺58同66分鐘先後破網連中三元；到69分鐘佢再助攻畀後備上陣嘅阿古路建功，助阿根廷以4:0大炒海地。阿根廷會喺下月九日作客以色列，進行決賽周前最後一場熱身賽，之後就迎接對冰島嘅首場分組賽。
大演帽子戲法之後，美斯喺國家隊入球數字已經有64球，固然繼續係阿根廷首席射手，計南美球員累積國家隊入球，亦超越巴西名將朗拿度，只係落後77球嘅球王比利。不過美斯要破呢個紀錄有啲難度，因為佢曾經暗示過，如果今屆世盃都贏唔到，就好大機會真係從國家隊退役，要追上比利唔易。美斯要追逐紀錄唔易，但佢老友馬斯真蘭奴喺呢場熱身賽就到達新里程碑，今場係呢位33歲老將第143次上陣，追平名宿辛尼迪嘅國家隊紀錄，賽前仲有特別儀式獲贈球衣。
阿古路着19號
阿根廷喺上屆世盃飲恨，展望今屆賽事，美斯喺賽後表示都唔敢抱太大期望：「今場波我覺得好開心，在場所有人都好支持國家隊，球迷嘅支持對我哋絕對有正面影響。贏世盃係每位國家隊成員以及國民嘅夢想，大家將會以一致嘅理想出發去俄羅斯，雖然我認為阿根廷唔係奪標熱門，但我哋有實力，每日都不斷進步，會盡力去競逐。」
另外，阿根廷國家隊方面亦正式公佈大軍世界盃球衣號碼，唔使講美斯梗係繼續着王牌10號，佢老友阿古路就要讓路，但今次嘅號碼就同上屆決賽周唔同，由20號轉用19號；成日被抨擊係敗家仔嘅希古恩，同上屆一樣着9號球衣。