澳門的士劏客問題嚴重，小記問過澳門立法會議員區錦新，佢話呢個問題喺澳門存在多年，講到尾係罰則太低，濫收車資只係罰款1,000蚊，根本冇阻嚇作用，「掠10單俾人捉1單，有乜所謂？」
牌貴難回本 靠老屈賺錢
區錦新話澳門的士劏客數字多到數唔晒，對象主要係遊客，因為澳門人好少搭的士，免得受氣！曾經有遊客想由氹仔威尼斯人酒店過澳門半島，點知司機獅子開大口叫價幾百蚊！區話無良司機嘅手法通常得兩種，一係開天索價，唔畀就唔開車，亦唔俾人落車。另一招就係，半路趕人落車，乘客要再截車就有排等。
區錦新話，澳門𠵱家有千幾架的士，其中650架係永久牌，其他嘅就係8年牌，牌費要80萬至100萬，永久牌炒到過千萬，以澳門的士19蚊起錶黎計，司機好難回本，所以就用老屈呢個方法賺多啲錢。遇到呢啲無良司機，最好嘅方法就係打999報警，或者記低的士車牌，向交通事務局投訴。澳門規管的士嘅《的士規章》係廿年前立嘅，一路都有聲音促請修例，公眾諮詢啱啱完成，有望年底通過，將罰款提高至3萬蚊。