「大熱,像赤道重叠!」呢排天氣熱辣辣,唔躁都好難,唔知係咪天口熱,食辣嘢,搞到心火盛,灣仔呢兩批男女,食食吓辣蟹無啦啦嘈起嚟,最後仲搞到爆樽,呃,係扑樽先啱,因為個樽好硬淨,冇爆到!
讀者林小姐拍攝嘅片段見到,噚日凌晨4點幾,差不多有10個人,喺灣仔橋底辣蟹門口嘈交,條片就聽唔到佢哋嘈乜,只係見到你推我撞,非常混亂,雖然有幾個人勸交,但係擋都擋唔住,突然間,有個男人拎起玻璃樽,一嘢扑落黑衫男個頭,最終個樽硬過個頭,黑衫男即場爆缸,但個樽就完好無缺。
傷者係姓黃台灣人,當時同姓胡嘅朋友歎緊辣蟹,幾杯酒落肚,同隔籬枱幾個男人嘈咗幾句,台灣男女之後埋單走人,出門口就俾佢哋襲擊,扑完人嘅當然即刻閃啦。阿Sir嚟到,喺附近搵到兩名涉嫌傷人嘅43歲男人,而被扑穿頭嘅傷者就由白車送咗去律敦治醫院。