日本周三喺橫濱主場友賽加納，今場亦都係日本教練西野朗四月上任以嚟嘅第一場比賽，可惜就落筆打三更，以0:2不敵呢支冇份參加今屆世盃嘅非洲球隊。
藍武士今場用咗近期頻頻練兵嘅三後衞陣式應戰，不過效果就麻麻，尤其是由前鋒轉型做右閘嘅原口元氣，面對加納球員嘅體力化踢法好似冇晒符咁，而日本傳統嘅控球踢法亦冇晒，開波九分鐘就俾加納嘅湯馬士柏迪主射罰球先開紀錄，主隊到上半場尾段先有兩次較有威脅嘅埋門。
日本下半場換入啱啱傷癒嘅香川真司（10號），可惜開波僅六分鐘又輸12碼，加納由艾曼紐保定射成2:0，最後亦都以呢個比數完場。踢完呢場波，西野朗會喺今日宣佈最後23人世盃大軍名單，不過以今場嘅表現嚟睇，就算揀邊個喺今屆世界盃似乎都係凶多吉少。