哈里王子大婚後，英國又有另一單要大事慶祝嘅事，就係下月嘅英女皇官方壽辰，原來英國都有派王子來港慶祝，之不過唔係威廉或者哈里，而係今年54歲嘅英女皇幼子愛德華王子。
英國駐港總領事館近日邀請不同人士出席喺香港嘅慶典，有關活動喺下月8號於金鐘港麗酒店舉行；除咗愛德華王子，丈夫同兩個仔都係英籍嘅特首林鄭月娥亦都係慶典嘅主禮嘉賓。
英女皇正式生日喺4月21日，根據往年經驗，英女皇會私下寧靜地度過生日，反而會喺6月份嘅官方壽辰先普天同慶，因為呢個時候天氣較宜人，更適合進行閱兵儀式。英女皇嘅官方壽辰日期每年都不盡相同，通常係喺6月第二個星期六。