高溫N連霸，連當紅的佛系信徒都無可避免，佛都有火。
降火沒捷徑，只能祈禱馬時亨晨早做了祈禱操，望佢老人家夜尿無影響到睡眠，瞓醒後上埋北角街坊福利會會長開發的八段錦app，拎咗創科局452萬的強身AI喎，肯定猛料對不對。馬主席只消高抬貴手，滑住手機就有高人指點，八段，咁絕唔會搞歪做柒段！
以此類推，高鐵香港段接軌大陸，衝刺通車，高鐵步南生圍後塵出奇悶燒的可能性，不在馬時亨公開資料的選項中。乘客自行執生，做「點心紙」剔：路軌轉彎，架車唔識轉，會唔會出現陳帆口中的「婚外情」意外呢？剔！當隧道頂唔住每年都會出現的三百年不遇特大暴雨，享受緊水舞間的列車乘客，應唔應該call大陸救援呢？剔！中介收過百蚊手續費代買國內線，唔買，係咪要俾黃牛㩒住搶？剔！一地兩檢冇搞過「大便論」，驚唔驚上車前被公安按倒在地鎖埋手扣罪名係……搶飛？剔！兇慣保安「我識你老闆」的逢國膠，會炮製「帶gel門」西九版嗎？剔！認同馬時亨識條鐵？OK，剔！