今周主題：加里夫巴利情歸可處？
今屆閃耀歐聯決賽的球星不是基斯坦奴朗拿斯（C朗），亦不是利物浦的穆罕默德沙拿，而是皇馬後備上陣入兩粒的加里夫巴利（圖）！其實以巴利的實力和入球率，比起施丹愛將賓施馬更值得正選，既然留在皇馬難找出頭天，倒不如回歸英超，加盟曼聯肯定可以名利兼收！
點解巴利同曼聯係絕配？首先巴利有能力做「奧脫福大王」，早年巴利在熱刺經常單天保至尊，極速爆破對手、遠射重炮「收死」門將，如今更練成倒掛金勾，「周身刀張張利」，肯定會成為卡利奧斯這些英超門將的惡夢，亦能取代「唔聽話」的保羅普巴成為當家球星。
且近年曼聯經常被批評踢「悶蛋足球」，但以防守戰術成名的領隊摩連奴，去年續約後短期內似乎不會離隊；而摩帥的進攻戰術，向來依賴球員的個人質素，要解決曼聯目前的進攻困局，巴利正正是最好的突破手。加上摩帥向來喜用球星，阿歷斯山齊士加盟後狀態再差亦幾乎場場正選，巴利加盟將不愁上陣機會。
加上能支付巴利高昂周薪的球會不多，但全球賺錢最多的球會曼聯，肯定能負擔得起。剛結束的球季曼聯四大皆空，陣容上「小修小補」已難令球迷滿意，倒不如一擲千金收購巴利，既可使曼聯實力大增，又可轉移球迷視線，在英國商業價值高的巴利，隨時會讓曼聯倒賺呢！
文：尊嘉