喺歐聯決賽，俾皇家馬德里後衞沙治奧拉莫斯整傷嘅利物浦翼鋒穆罕默德沙拿，已經去咗西班牙療傷，希望趕得切喺世盃前好番，不過向來友善嘅沙拿到達西班牙嗰陣，喺機場俾當地電視台記者追訪，問呢位埃及球星「你覺得拉莫斯係咪故意？」、「你下季有冇可能過皇家馬德里？」等問題，但沙拿一句都冇回應就走咗去，好似心情麻麻喎。
至於利物浦另一悲劇人物卡利奧斯就有另類到「安慰」，下季升上意丙作賽嘅里米尼會長格拉斯發表公開信，話願意為卡利奧斯提供一年合約，幫佢重拾自信。格拉斯喺公開信中表示︰「6月22號卡利奧斯就25歲喇，其實我哋都經歷過呢啲時刻，唔好彩，佢係喺數百萬人之前出現……我希望幫助卡利奧斯重新企番起身。我想送佢一份生日禮物，就係里米尼一年合約，幫佢重拾冷靜、自信同追求夢想力量。」我求大俠聽完覺得，呢支意丙隊明「抽水」啦!