沽空機構Blue Orca Capital上星期出手唱淡新秀麗（1910），令隻股份至今都未復牌。Blue Orca Capital創辦人Soren Aandahl噚日出席一個投資論壇時，當然繼續圍繞住佢份報告，同埋隻新秀麗嚟講喇。
本身份報告就話連佢哋個代言人——皇馬球星C朗拿度喺instagram所上載嘅相，都顯示佢自己係用LV行李喼，而唔係新秀麗旗下品牌嘅喼，證明新秀麗嘅產品唔單止唔潮，亦唔係行高檔路線。咁巧合地，喺6日之前，C朗就即刻喺自己個instagram上載返張用新秀麗喼嘅相。
Soren Aandahl係演講時就拎晒兩張相出嚟做對比，話C朗拎LV行李喼時嘅表情明顯係開心啲，係「Happy Ronaldo」，而用新秀麗喼嘅C朗表情就睇上去好似好慘好傷心咁，話呢個係「Sad Ronaldo」，引起全場大笑。Soren Aandahl出咗報告後都咁密切關注新秀麗，睇嚟佢哋班公關之後都有排煩啦。
李華華