今時今日，襪套設計幾乎已成大部份運動鞋基本配備，無他嘅，襪套夠貼腳，加上多配合針織物料，高透氣，整體舒適感相當高。而近日ASICS就推出了HyperGEL-Kenzen系列，同樣以襪套設計示人，更去除鞋帶部份，穿着方便。
中底一向是ASICS強項，唔少人着過佢嘅GEL底都話舒服，而今次新系列就在GEL之上再加入新技術，就是在中底部位隨機注入佔中底15%、備有優秀緩衝性能的顏色顆粒，令緩衝膠能夠更快回復原本形態，加強緩震效果，提高舒適度及耐力，更稱能減少體能消耗，不過係唔係真呢，或者就要真正試跑過先知喇。值得一讚的是，今次新系列外形設計的確比品牌之前的運動系列討好得多，運動之餘，着出街配襯亦不俗。
除新系列，原來今年又正正係品牌創始人鬼塚喜八郎（Kihachiro Onitsuka）誕辰100週年，雖然香港人未必識佢，但品牌當然會推出相關限量系列紀念一下，並命名為「KO100」。系列包括ASICS、ASICSTIGER和Onitsuka Tiger三個旗下品牌，以向日葵的紅、橙和黃作搭配，原來係因為鬼塚先生對藝術家梵高非常熱愛，所以以其名作作靈感，更同時希望帶給人正能量。不過講真，配色就頗誇張，個人嚟講對黃色亦真係無乜好感，喜好黃色鮮色的跑友或者可以留意下。另外，此系列全球只限量1918對，來紀念鬼塚先生的出生年份，香港亦只有極少量配額，對品牌有愛的就要有買趁手了。
查詢：
a. ASICS專門店：旺角奶路臣街17號THE FOREST 1樓101號舖
b. Onitsuka Tiger旗艦店：銅鑼灣Fashion Walk京士頓街6號漢寧大廈地下A&C舖
記者：韓繼聰
全新旅遊專頁，即like籽想旅行： https://fb.com/travel.appleseed