早排先有台灣遊客投訴喺澳門被黑的坐地起價並出言恐嚇，近日又到香港人中招。話說一對香港夫婦，帶同一歲孖女去澳門玩完後搭的士去碼頭，點知嗰架係黑的，30幾蚊車費，司機竟獅子大開口要收200蚊，夫婦拒就範，司機拗唔過終肯開車，但恐嚇話要吹雞教訓夫婦，最後因落雨塞車始未成事。
不停以手機影港客
事發喺周日下晝4點，當時落緊大雨，關氏夫婦喺葡京酒店門口截的士去港澳碼頭準備返香港，兩夫婦各抱住孖女登車30秒後，揸緊車嘅司機突然開口話要收200蚊先去，畀咗錢先開車，兩公婆唔肯，個司機見老屈唔得，就話「澳門個個司機都係咁，第一日搭車咩」，又話「無錢學咩人搭的士」。
司機見呢招唔work，猛咁叫兩夫婦落車，兩夫婦唔甘心被欺負，即時口角還拖，司機將車停路邊，雙方不停鬥嘴僵持不下，過咗5分鐘司機終肯開車，但同時透過手機call台吹雞，話有客唔畀錢，叫人去港澳碼頭做嘢，且沿途恐嚇夫婦，又不時急煞停及亂扭軚嚇車內人。
兩夫婦抱住孖女唔敢亂郁，又驚真係有吹雞嚟嘅社團，終於捱到碼頭，此時call台亦傳嚟被吹雞手足嘅聲音，黑的司機疑見塞車，回應話「費事啦，都4點嘞，好塞車」，然而事情仍未結束，咪錶顯示車資35元，但司機不停咁用手機影佢哋嘅相，又話唔收錢，叫佢哋留番啲錶錢去執藥。
由於BB車放喺車尾箱，兩夫婦驚司機趁佢哋落晒車開走的士，於是老公先攞BB車，再抱個女走。其後老公畀50蚊司機，司機唔找錢，仲講句死港燦，跟住開車走。夫婦話，「見到兩個女嚇到面都青，好心噏」，話對澳門治安失望。