長沙灣海麗邨街坊讀者簡小姐，噚日下晝差唔多兩點，行過並且，明樓見到一位年約40幾歲嘅阿姐喺度大吵大鬧，「佢話：『我住喺度㗎，做乜唔俾我入去？』」簡小姐冇理佢，就去咗商場嘅大快活餐廳食下午茶。
突然除衫瞓地下
簡小姐同朋友食得七七八八嗰陣，突然聽到有人嘈交，原來又係嗰位阿姐，佢身邊仲跟住幾個邨內嘅保安員，阿姐行到入去，好大聲話：「我要食嘢！」跟住又坐咗上張枱，「佢係咁用粗口鬧人，跟住仲拎起杯人哋飲剩嘅奶茶，潑落個保安度」。好彩保安眼明手快，用手上嘅文件夾擋住先冇濕身，阿姐一個轉身，又拎起第二杯再潑，不過俾保安哥哥擋開咗。
呢位阿姐足足喺大快活玩咗10分鐘，離開商場之後，竟然突然間除衫，無上裝咁瞓咗喺地下，女保安員即刻幫佢遮住，此時警察同白車都到場，結束阿姐嘅夏日劇場！警方回覆下午近3時接報，海麗邨一名姓張女子於邨內騷擾住客，將案件列作發現精神混亂人士處理，並將她送到明愛醫院。