在波士頓大學畢業嘅財務K於5月28日中午來電，聲音低沉咁講：「上帝好唔公平，塞爾特人對騎士，輸咗畀克里夫蘭騎士，入唔到NBA決賽呀！點解年年都係要勒邦占士打決賽嘅啫！」左丁山都睇到NBA APP，知道占士大發神威，帶領騎士以87比79贏咗塞爾特人，占士繼續第8年進入NBA總決賽，連續4年帶領騎士打總決賽，又創下一個紀錄，米高佐敦都冇咁威；但過往七次決賽，只贏過三次，比起佐敦贏咗六個冠軍指環，仍要努力，睇怕佢今年已經33歲，恐怕未必有機會破佐敦紀錄了。另一邊廂，西岸決賽又係由金州勇士勝出，於是連續四年係勇士對騎士爭標，球迷悶唔悶啲呢？
但財務K呢位波士頓擁躉失望啫，波士頓富豪John Henry更加傷心，Henry先生係利物浦大股東，5月26日晚上在基輔睇利物浦對皇馬爭歐聯冠軍，利物浦慘敗一比三，跟住到5月27日美國時間晚上，唔知佢又有冇趕返波士頓睇波嘞，波士頓又輸掉NBA決賽資格，你話呢位班主36小時內眼見自己鍾意嘅球隊連輸兩場重要比賽，唔傷心過一般觀眾就係假嘅。
波士頓塞爾特人在季後賽時期，主將Irving養傷，今季玩完；利物浦輸波，衰在決賽第30分鐘，主將沙拿受傷離場，John Henry如果在香港有知交，或者要請呢位老友代佢去車公廟拜神祈求轉運，乜唔係咩？澳洲冠軍騎師貝湯美今季成績好差，蘋果日報報道有高人帶貝湯美去拜車公廟之後，立即在5月27日賽馬贏咗三場兼一場大冷Q呀！不過西方人唔會信呢樣嘢嘅嘞，講都冇用。八卦啲講，一位對八字與顏色有研究之馬迷C，幾乎係半個林健鋒，識得睇綵衣顏色，就話過畀左丁山聽：「有報道話施丹好迷信，主要賽事會着番佢贏過大賽嗰套西裝。我唔記得佢着甚麼西裝，但有留意皇馬作客拜仁嗰一次，拜仁穿紅衣，皇馬穿白衣好合邏輯，但皇馬偏偏穿深藍色，嗰晚對藍色係吉利啲嘅，結果皇馬贏波，總之皇馬有意無意間往往得到幸運之神眷顧，激死皇馬對頭人。」皇馬人才濟濟，踢歐聯零舍精神，又可能因為足球上帝愛皇馬，已經贏咗13次歐聯冠軍，拋離利物浦（五次），強如巴塞，也望塵莫及，但皇馬是否歷史上最佳球隊？咁又未必，加迪奧拿領導下之巴塞有佩奧爾、恩尼斯達，沙維、美斯、伊度奧，前中後三線都係一時之選，橫掃西甲及歐聯，先至係地上最強球隊！