天氣真的太熱，兩隻馬都有火。
一隻馬發覺自己珍惜如生命的gel不能隨身帶上飛機，老馬有火，先是自報家門，再攀搭關係抬出高層姓名，總之就是「大石壓死蟹」，死馬當活馬醫，就是要有特權破例上機。
事後傳媒的追訪重點，都被這隻馬帶領之下跑偏了賽道，大家一股腦兒認真考究「究竟一支200ml但用淨少少的gel是否仍符合規例」，卻忘記重點不是gel，而是「撻朵」。為甚麼要自報議員身份？為甚麼要說林天福的名字？為甚麼最後可以放行？為甚麼，一支gel也要使用特權？我如果是林天福，一定會打電話告訴那隻馬：「大佬！你下次可唔可以遇到危急關頭、無帶passport、無帶機票呢啲問題先搬我個名出嚟呢？我咁高級唔係用嚟招呼你支gel㗎！」
無辦法，人總是希望篤住自己個鼻便能與別不同，連酒樓等位你都會忍不住攀搭「我同陳經理好熟俾我入去先得唔得」。
很奇怪這隻馬為甚麼入機場安檢的時候，不懂得用自己的金句來化解矛盾呢？「入鄉隨俗」啊！
另一隻馬更厲害。高鐵千億工程接連出事，又滲漏又出軌，記者追問更多資料，反被此馬揚蹄踢翻，拋下一句「要咁多資料做乜？我話俾你聽OK就得。」
這等於說「不要問只要信」的教條，那不是普通的馬，而是變成了「神馬」。煮到嚟就食，食完就埋單俾錢，你問咁多廚房炒好未啊？點解廚房有燶味做乜先得㗎。
你試試去車房整車，車房話保證一小時後有得攞，但你眼見車房事故頻生，又漏電又漏水，你作為車主，都一定會問：「師傅，你舖頭無問題吧？仍然可以準時交番架車俾我嗎？」
想想當日葉劉也只是不肯推出白紙草案，也未敢拋下這句話：「23條我哋話OK就得啦。」這十年香港的氣溫真的升太高，天口太熱了。