長和系主席李嘉誠退休後，佢嘅李嘉誠基金會，放水行動停不了，今次水源射至「伙伴倡自強社區協作計劃」撥款資助嘅社企《好聲》書。
基金會繼2016年後，今年再度支持《好聲》書，呢次贊助250萬，送贈一萬本發聲書畀不同機構有需要人士。呢次送贈嘅《好聲》書，包括喺7月全新推出嘅2,000套（一書三冊） 《好聲金庸系列──書劍恩仇錄》，以及4,000本《好聲音樂系列──許冠傑》嘅專輯，等長者、視障人士、住院病人可以不受限制，享受武俠世界樂趣，仔細咀嚼香港情懷。
誠哥今次支持嘅《好聲》書中，《書劍恩仇錄》首次加入長者同視障人士參與聲演，佢哋同演藝界及政商界名人，包括馬時亨、林家棟、鄧麗欣同趙國雄等一齊聲演，將經典角色活現眼前。