被封為拚命三郎嘅荷蘭名將古積特雖然上年已經宣佈掛靴，但今年四月又復出，協助身處荷丙嘅母會Quick Boys打升班戰。喺荷丙完季之後，古積特正式掛靴，成名球會飛燕諾禮拜日仲幫佢搞咗場紀念賽，邀請各方好友嚟參加，昔日利物浦隊友謝拉特、加歷查同班拿約等都有份落場，新任橙軍領隊朗奴高文亦都畀面出席。
古積特嘅昔日戰友分別組成三支球隊作賽，分別係飛燕諾隊、古積特朋友隊同埋橙隊。其中橙隊係由一眾現役同埋退役荷蘭國腳組成，陣容亦星光熠熠，成員包括尹佩斯、賴恩巴布、雲達華治同埋喺三月退出國家隊嘅史奈達。
為咗答謝山長水遠嚟撐場嘅朋友，古積特之後喺社交媒體發文話︰「真係美好嘅一日，好自豪同榮幸有咁多球員、教練同粉絲出席我嘅紀念賽，我想向所有人講聲多謝！」
