新民黨立法會議員容海恩呢排喺外傭界爆紅，搶盡黨主席葉劉淑儀風頭，皆因佢就外傭假日聚集影響衞生向政府提問，觸發多個外傭組織「通緝」，終於喺周日同外傭團體組織見面，其間講咗句"I'm really sorry"，但冇喺鏡頭前正式道歉。就喺風波開始平息之際，容海恩喺facebook貼相，相中可見佢同外傭打成一片，排排坐傾密偈，莫非想補鑊，唔想再被外傭狙擊？
八方打探過，容海恩原來係喺周日去咗美孚實地視察外傭聚集嘅情況，順道直接同佢哋接觸，了解佢哋離鄉別井有乜困難。而佢喺fb就話嘞，香港對外傭嘅需求好殷切，認為如何喺現有政策下，給予外傭喺休息日有更佳更充足嘅休憩空間，檢討已經刻不容緩。
容海恩仲重申若果有關提問令外傭覺得唔尊重，再次講句唔好意思，「因為這絕對不是我的原意」，強調會繼續同工會代表緊密聯繫，一齊為外傭爭取應有權益喎。