突然加倍落力攻擊政敵，事出必有因！俾民主黨「天下為公」計劃重新再狙擊UGL事件嘅前特首689，唔知係咪狗急跳牆想搵其他事甩身？近日連番發表網誌，唔係反駁外界對大灣區嘅意見，就以港獨問題針對個別人士，莫非覺得如此落力為阿爺重視嘅議題做炮手，無功都有勞，會因此避過UGL事件嘅「劫數」？
順手鬧埋陳雲戴耀廷
689噚日就突然向前立法會議員、於浸大任教嘅公民黨陳家洛翻舊賬，以提問形式指唔少人會問梁天琦同部份大學生明目張膽支持港獨，係喺邊度學？繼而指有報章分別喺2015同2016年登過陳家洛嘅訪問同撰文，引述陳指會挑戰學生，問大家有冇諗過有朝醒來，「五星紅旗升不起」？689話喎，「陳反共也要反得理性，除非他是想害香港。因為中國政府倒下來，對香港絕對沒有好處。」
呢次粒炮亦唔只打陳家洛。689直指陳家洛同浸大唔係「獨家獨市」，引述嶺大陳雲同港大戴耀廷部份發表過類似中共倒台嘅言論，又喺度亂扣帽子，認為「有這樣的老師，就有這樣的青年人」，並指「精人出口」，呼籲學生同家長要「帶眼識人」。雖然冇叫浸大郁手，但呢種文革式批鬥目的，呼之欲出。
八方問過家洛，佢淡然回應，"He goes lower.We go higher."。嘩，輕輕改寫美國前第一夫人米歇爾金句嚟回應，果然同689，唔係同一水平。
李八方