比馬時亨更寸，會寸到什麼樣子？答案是馬時亨為寸爆自解：因為天口熱。
天口熱一般人會有什麼反應？浮躁、不耐煩。高鐵試車頻頻出事，由甩轆到信號系統不穩定到車輪出現耗損，馬時亨一句頂百樣錯漏：「我哋話畀你聽OK就得。」正正是不耐煩小民諸多事實的表現，一副關你什麼事，講得多你都唔知我噏乜的態度，賴天口熱，唔賴地硬，即係承認我係唔耐煩，我面對這些記者問題會好躁，會火滾。
道歉其實不值錢，又不用負責任，如果嫌道歉有失身份，也可以用「為事件感到遺憾」輕輕帶過，彷彿路人跟市民一同旁觀種種甩轆情況，真遺憾，不用上身。馬時亨連遺憾都慳番，賴天口熱，是不是比馬時亨更寸？天口熱無遮無掩的地盤工人，可不可以寸番馬主席，你在冷氣大開的記者會又有幾熱？
如此高傲sell高鐵，馬可謂緊跟形勢，學了環球時報那套，動不動就向質疑者亮劍，把囂張當權威，既然公開更多資料也於事無補，你讓我們關起門來處理就好，就像食肆廚房，不管衛生情況如何不堪，閒人勿進，食物煮好有得食就食，萬一食壞人，也因為天口熱，總之別滋事。
把幾百億公帑建設當私人餐館，未開業前漏水，沒理由要向未來顧客交代，真係冇咁上下寸都噏唔出口；你說他比喻不倫，好似係，除非唔係，佢係可以講：「餐廳你唔鍾意咪唔好幫襯，高鐵驚咪唔好坐囉」，這亦是他一貫本色。
馬時亨最寸係賴當日天口熱之外，可能係當日朝早冇祈禱喎。又嚟，又嚟一件抽上帝水的水貨教徒。這類教徒遇事即把宗教當頭盔，慌死人唔知佢信主，平日亦有意無意把祈禱、神的旨意掛唇邊，覺得是道德認證，論表現舉止談吐，卻無一符合教徒該有的德行，或者，他們在神面前才會稍微謙卑吧。
如果缺了一個早禱，就會囂張浮躁亂噏廿四，很想問馬主席，佢幾耐冇祈過禱。要改善其嘴臉，得像沙士時期，密密祈禱祈禱再祈禱，而且，更需要做的似乎是告解。
以上針對馬主席在電台自辯天口熱冇祈禱，實在過分認真，唔應該陪佢癲埋一份，人家開我們玩笑而已。馬主席一向懶幽默，把重大話題當講笑，土地供應不足，他說可以在葵涌貨櫃碼頭上空再起上蓋，由港鐵負責起樓，把港鐵站開到那裏，嘩，蓋好了有沒有巴別塔那麼高呢？你以為那時順口開河？這是放氣球試水溫當講笑。若你問他這真的假的？他或許會說，這是祈禱時聽到神的聲音。