各位司機大佬，揸車時要打醒十二分精神，因為人命攸關㗎！讀者劉先生噚日朝早7點幾，揸車返工嗰陣，一出西隧就見到驚險畫面，當堂嚇到醒晒，話說劉生前方有架的士，同埋一架載滿客嘅962線城巴，過咗海去到港島，巴士駛咗去中線準備去中環，尾隨嘅的士就慢線去上環，點知去到分岔路口嗰陣，城巴司機好似如夢初醒咁，發現自己行錯路，突然扭左軚cut雙白線。
的哥開窗大鬧
當時架的士同巴士並排而行，的士司機一見城巴突然cut埋嚟，梗係即係收油扭軚閃避啦，就咁被夾喺路邊鐵欄及城巴之間，好彩司機大佬反應快，先冇造成意外。險過剃頭，司機大佬梗係嬲到爆啦，即刻打開車窗，指住城巴係咁鬧，之後就繼續開車。「好彩今日好天，城巴又冇打燈又冇睇倒後鏡就cut線，若果落雨天一定煞唔到」。劉生認為，城巴車長根本無集中精神，「好似發緊夢咁，唔知係咪冇時間休息，冇可能行錯路，個車長真係要去再培訓」。