九西女將劉小麗噚日出動，宣佈撤回宣誓案上訴，換言之九西即將又有補選。就喺呢個時間，另一九西女將又蒲頭，近期較少露面嘅游蕙禎喺facebook撰文，拆解旺角殺街「大陰謀」！
罵政府唔執法 擺居民上枱
身為當區居民，游BB話非常清楚街坊面對嘅困境，每逢假日梗係唔想留喺屋企聽「魔音」，所以𠵱家嘅決定就算唔係最理想（因為恢復行車都唔係完全冇噪音），但對街坊嚟講相對係好。
但查實游BB最想講嘅係，街頭表演者、居民同警方之間嘅角力同矛盾，冇因為菜街取消行人專用區而消失，而查實居民都唔係想趕絕表演空間，只係政府對當眾索要打賞行乞等唔執法，仲將居民擺上枱達至「殺街」效果，佢相信政府嘅目標唔只係一條半條小小西洋菜街，而係其他同樣被噪音及所謂表演佔據嘅休憩場所同屋邨公園，估計最後可能出現嘅情況之一，係街頭表演要「依民意」發牌，即係會「篩選」表演者，亦有可能關閉部份休憩用地或有時段限制！唔少網民讚游BB思路清晰，言之有物，亦有人大讚張相好有型。