銅鑼灣一間超市喺星期六俾人偷嘢，有個中年男人偷咗幾盒壽司準備慢慢嘆，點知原來阿Sir老早贒到佢，等到小偷行出超市門口，便衣警員就人贓並獲，當場將佢㩒低拘捕。不過對方激烈反抗，搞到頭同口都撞到流晒血，有圍觀途人仲以為疑犯咬脷自殺，最後男子俾阿Sir鎖上手銬，送院治理。
間超市位於記利佐治街，人流都好旺，咁啱阿Sir喺附近一帶進行反盜竊巡邏，小偷當場斷正啦。事發喺星期六傍晚，讀者陳先生見到一個中年男子攞住幾盒壽司走出超市，突然有兩位便衣阿Sir衝出嚟將佢拘捕。
個男人當時爆晒粗唔肯就範，極力掙扎，其後兩、三個阿Sir增援，四、五個阿Sir終於合力將個男人制服喺地上，嗰幾盒壽司就跌到通地都係。警方證實拉咗個32歲姓余男子，佢涉嫌店舖盜竊，喺超市偷咗300蚊食物。警方又承認疑犯一度情緒激動，頭同口受傷，事後送去律敦治醫院治理。