一曲《笑看風雲》，令李華明為民主黨今年黨慶增添一筆「花生賬」。1991年晉身立法局、2012年放棄連任，近廿年議會生涯，肥仔明睇住唔少官員平步青雲，就政策交手亦建立交情，包括現任特首林鄭月娥，「當年開辦事處做社署署長嘅林鄭都有嚟主禮」，所以當娥特以「一個友情的行為」解釋以3萬蚊贊助肥仔明唱歌，又好似唔多令人奇怪。
從政路源自加國唐人街
老竇喺佢7歲時過身，四兄弟中排第三嘅肥仔明話自此家道中落，由住跑馬地有司機接送到搬去鑽石山住石屋仔，佢自稱喺學校係「鵪鶉」，喺天主教伍華中學讀書時，「全班同學可能得我未試過走堂」，反而喺黃大仙聖雲仙堂青年會時期就會幫手搞補習班同康樂活動。入唔到中大後到外國升學，除咗係加拿大滑鐵盧大學文學士，亦喺多倫多大學社會工作碩士畢業，1978年回港入行做社工；佢曾經喺浸會學院教過書，「邵家臻都做過我學生」。肥仔明話自己中學得120幾磅，係去加拿大後先暴肥廿幾磅。
點解之後從政？肥仔明話喺加拿大讀書時於唐人街服務中心做過實習，亦幫過參選人拉票助選，自此結下政治緣；80年代尾加入匯點，其後匯點同港同盟合併為民主黨，佢都代表參選，同前港督彭定康有唔少過招機會，憶述肥彭九七回歸離港前，民主黨請佢去鯉魚門食海鮮餞別，「肥彭話椒鹽瀨尿蝦好食，未見過，問我哋係乜嚟？我又唔識瀨尿蝦英文名，索性直譯peeing shrimp，當堂嚇親肥彭」。
