雖則係建制派，實政圓桌田北辰言行有時卻更似泛民，噚日朝早立法會經濟發展事務委員會討論支持機場三跑系統嘅設備等等，涉及逾81億款項。以為建制個個都支持？No No No，田北辰明言支持機場建三跑，但認為政府現時提交嘅資料不足，所以提出冇約束力動議，叫政府向財委會提交撥款前向立法會提供詳盡資料，動議最終喺10票反對下被否決，而唔計田二少嗰票有7票贊成，絕大多數係民主派，另外嗰票就係另一新界西直選議員何君堯。
「可能佢哋好buy馬時亨嗰套」
八方問過二少，點睇咁簡單嘅要求都被否決？田二少話要求政府畀多啲資料箒，唔明點解會有議員唔支持？「可能佢哋好buy馬時亨嗰套啦！」即係政府話你聽OK就OK，而田二少明顯覺得唔OK囉。