馬某帶着超限額美髮啫喱容器登機，結果成了娛樂版盛載不下的社會新聞，滿頭青絲的圍觀者揈一揈漂亮的黑瀑布搶白：「咄，搭嗰幾個鐘頭飛機啫，gel少一陣使唔使死？」非常對不起，這個火唔到肉唔知痛的問題，答案極可能係「gel少一陣會死㗎」。一處鄉村一處例啊老友，禿頂村的規矩你識條毛咩，夏蟲們恃住父母所賜的毛系資本豐厚，中意紮馬尾就紮馬尾，喜歡梳墮馬髻就梳墮馬髻，髮型隨心所欲五時花六時變，反手為雲覆手為雨，怎會瞭解牛山濯濯之苦，頭殼頂疏落的一綹毛只可以set定一個樣，郁吓就前功盡廢。勿以為短途飛行航程濕濕碎，就算坐頭等都係咁話，不長眼睛的氣壓不分富貴貧賤，不費吹灰之力便可以將任何人搞到好殘。遠的不說，月前美國總統出巡，落機嗰陣敏銳的攝影機不是捕捉到他後腦的真相嗎，小心翼翼左冚右冚營造出來的假象毀於一旦，你話幾唔抵。
從前有部劉家良師父執導的港產片叫《爛頭何》，聞者無不喪膽，這位「Gel頭馬」為保持市容美觀略盡一己之綿力，你們還要恥笑他貪極唔靚，太殘忍了吧？何況如無記錯，出事那天馬先生上京開會，分秒必爭注重儀容不外為港爭光呀，縱使大細超的黃絲蟻不肯再攀爬他梳得光光滑滑的頭髮，仍然一絲不苟帶定支gel以防萬一，其實值得高度表揚。我在這裏挺身而出仗義執言，小心眼的八婆莫定性為兔死狐悲，雖然在下的煩惱絲早就甩得七零八落，可從來沒有進貢美髮公司購買產品以圖掩飾，威廉王子尚未剷頭，我已一了百了自行電刨削髮，年中省下的費用，夠買一張巴黎東京來回機票。