受高空擲物影響多時嘅董叔叔，13年前搬入東涌映灣園打算享受園藝樂，但就不幸遇上擲物狂，令佢每晚都提心吊膽。對於今次警方成功拘捕擲物狂徒，董叔叔大讚警方做到嘢。
近日天氣悶熱，警方連續三晚喺戶外埋伏，董叔叔都話覺得警員辛苦，仲問「要唔要飲啲嘢」，次次對方都好客氣婉拒。
董叔叔又讚警方「配合晒、好專業，閒話都唔多句，好有默契」，原來拘捕疑犯當晚有5人便衣警小隊工作，兩人負責喺董叔叔平台花園監視，一發現冒火煙頭從天而降，馬上通知喺樓上埋伏嘅同袍拘捕疑犯。
董叔叔之前曾怒批警方hea查，更親自到警署投訴，又向《蘋果》求助，結果警方埋伏三晚終有結果，「我都知佢哋（警方）開始係點嘅，不過要個結果囉」。董叔叔話事情發展至此，管理處責無旁貸，「懶懶閒出張通知就算數，咁嚴重嘅事你上去講就有阻嚇作用！」近日終得安寧嘅董叔叔，訪問時語氣亦平靜好多。