大陸網友推動法院自由行，上載庭內開審的照片，叫人親身去體驗。厲害了，強國遊客，厭倦某個廢柴議員搞到一鑊泡的邊境購物城，識玩當然要玩鋪勁，未來，除了法庭自拍遊，強國遊客，強力推薦：
旺角西洋菜街雖然已經通過殺掉專用區的歌舞昇平，但強國遊客依然可以揸咪獻唱，支支都係愛國到爆的義勇軍進行曲，以中國各地方言母語live，邊個敢阻佢開咪！旺角好聲，中意點唱都得，食環唔准？憑什麼？條街係公開的，歡迎所有人come here to learn。同胞們，聽得明中式澳洲英文吧？
粉嶺高球場肯定撇除在林鄭大便論那千二公頃土地之外，強國遊客玩膩了西貢紮營，只消跟住阿叻用八百港元就能入去tee off，聯手打他媽的18個洞。萬一高球會職員阻住強國男女的地球轉，記住學阿叻兇佢：無我地中國遊客，你地17萬個高球從業員邊有飯開，等住食屎啦！
還要去南生圍體驗「悶燒」與「縱火」的不同動機與意圖。而趁住高鐵未爆出更大的「必然」事故前，記得去西九打卡。日日大覺瞓的馬時亨覺得OK，相反feel的你預感會PK。喔，祝旅程愉快。