其實月薪逾8萬至12萬嘅政治助理平日做啲乜？唔好話普通市民，就連立法會議員似乎都唔多清楚，所以要向政府提問。而原來早前嘅預算案特別質詢中，就有一條滄海遺「Q」。
促提供聯繫議員次數
有花生友留意到，工聯會麥美娟（Alice）向三個局索取該局政治助理嘅詳細職責為何；「有幸」獲Alice「睇中」嘅三名政治助理包括民政局黎穎瑜、勞福局馮興禮同發展局馮英倫，Alice要求局方回應佢哋過去同持份者即係議員、議員助理等嘅聯繫次數等，相信大家都估到呢個問題難有答案，所以三個局都話冇為相關工作備存統計數字，睇落呢條Q，似乎旨在「問」多過「答」咁噃……
八方問過Alice，佢話三個政策局同佢議會專責範疇有關，自然有興趣知道佢哋政助嘅實際工作狀況；驚唔驚咁問法俾人感覺搞針對？「唔會，相信政治問責官員心胸都好廣闊嘅！」佢坦承三人實際上係比較少接觸佢嘅，希望喺政府冇數字提供下，可以用工作表現證明佢哋有同相關持份者做好聯絡溝通啦！