又到小記拋書包時間，話人唔知醜，可以用「臉皮厚」，話人極度唔知醜呢，就可以用「臉皮厚過惠康賣嘅橙皮！」點解？問吓住喺西環嘅讀者吳太就知喇！
果皮佔重量六成
話說吳太上星期三喺北街嘅惠康超市，買咗一袋4個新奇士橙，第二日喺屋企切咗其中一個，準備同老公一齊慢慢嘆，點知怪事就發生喇！切呀！切呀！切極都見唔到盡頭，橙肉你在何方？「切到個橙唔見咗一半，都係冇乜橙肉！」吳太見到咁奇怪，第一時間懷疑呢隻係假橙，由於擔心安全，最後冇食到個厚皮橙，好彩其他3隻嘅橙皮厚度都屬正常，只係唔多甜囉！吳太同老公都話，呢世人都未見過咁厚皮嘅橙，除咗覺得好奇怪之外，仲好擔心咁嘅厚皮橙，食咗落肚對健康有冇影響？
小記都好想見識吓呢隻新品種，所以就去同吳太八吓，仲帶埋個電子磅秤一秤，發現個橙嘅總重量大概290.5克，果皮重171克，佔總重量近六成。嘩，咁到底係食皮定食肉呀？回水喇！抱歉，發現已經冇同一批橙賣，記者於是喺呢間惠康買咗另外兩批新奇士橙，但發現果皮厚度正常，冇異樣，所以睇嚟唔排除「超厚皮橙」只係個別事件。
小記之後去咗北街惠康超市睇過，發現已經冇呢批橙賣，於是買咗另外兩批新奇士橙，但發現果皮厚度正常，冇異樣，所以睇嚟唔排除「超厚皮橙」只係個別事件。
惠康發言人就話，𠵱家喺分店同新鮮食品中心嘅新奇士橙都係美國進口。相信有關情況係個別事件。超市對產品質量非常關注，希望顧客帶埋相關貨品去分店進行退款，協助了解事件再同供應商進一步跟進。