皇馬王牌C朗（白衫）喺今屆歐聯又成為神射手，但喺決賽就冇波入，原本佢喺完場前有機會入番粒，但就件俾一位不速之客破壞咗好事。比賽到最後時刻，C朗喺右路諗住射門嘅時候，突然出現咗一個闖入球場搗亂嘅球迷，球證亦吹停比賽，搞到C朗冇晒癮搖頭苦笑。
有品巴塞祝賀皇馬
皇家馬德里又一次贏咗歐聯冠軍，實現歐聯三連霸嘅偉業。而作為佢哋嘅死敵，巴塞隆拿亦通過官方嘅社交媒體對皇馬表示咗祝賀（圖）。同皇馬咁多恩怨巴塞都不計前嫌道賀，認真大方。
普京落柯打搞沙拿？
利物浦核心穆罕默德沙拿（中）喺歐聯決賽上半場傷出，唔少球迷諗得好陰謀論，竟然將矛頭指向俄羅斯總統普京。球迷指摘普京，指佢因為唔想沙拿喺下月世界盃決賽周第二輪分組賽，埃及對俄羅斯嘅比賽中上場，而落「柯打」專登整傷佢咁話。
