IFC稻菊改名做四季菊（SHIKIGIKU），特登走上去試吓，見到總經理Victor Lui（呂思安）笑面迎人，問Victor有乜改變呀，Victor話：「只係改名，改logo啫，其他一切不變，以後食物會改得更好，既然叫得做四季菊，當然不時不食，食材一定按照時令，搜羅日本最啱時候季節嘅食材來港，天婦羅，鐵板燒，壽司皆有專櫃，大廳有無敵海景，左老闆見慣啦！」
做得餐廳總經理，把口當然甜滑，有理冇理，食吓佢介紹嘅時令菜，當係tasting menu，收千五元，在中環唔算貴㗎嘞，去「山下」食鐵板燒，「一寶」食天婦羅，隨時埋單超過千五元。呢份菜單有前菜（北海道毛蟹醋物，燒鹿兒島和牛伴海膽），有刺身，有天婦羅，有煮物（伊勢海老），鹽焗鮑魚，佐賀和牛水菜釜飯，甜品係京都蜜柑啫喱，真係食到飽一飽，呢份餐單嘅性價比冇法子唔like！
順口問吓下午茶，Victor話四月一日推出，一出就轟動（價錢係498元兩位加一），星期六星期日下午三時到五時十五分供應，每星期都爆到瀉。有乜好食呢？一個high tea set包括壽司，蟹卷，燒福井鰆魚，櫻花豆腐伴北海道鮭魚籽，北海道帆立貝伴牛油醬油，煮季節野菜，櫻花啫喱奶凍……京都和果子，日式鬆餅，共11款13味，兩位小姐去食，好有挑戰性，日式下午茶，在中環好似係只此一間，去慣文華東方、四季酒店排隊吃英式下午茶嘅，不妨在周末轉移陣地一試。肥仔K呢個日本癡聽到，話一定要同太太嚟食一次，Victor話：「唔該盡量提早打電話訂位！」
與酒店C講番，問酒店內（好多人以為四季菊係四季酒店之日本餐廳，其實不然，四季菊係新鴻基地產帝苑酒店旗下餐廳，IFC係新地與恒地合資聯營嘅）餐廳點解咁好生意？酒店C話香港酒店得天獨厚，香港人均收入高，本地人消費力強，所有酒店嘅餐飲生意，皆以本地人為主，遊客只係佔少數，故此，酒店如果唔努力做好餐飲經營就蝕晒章；東南亞嘅豪華酒店就慘情啲，本地人好少到酒店吃餐，以左丁山親身經驗，曼谷間間五星酒店餐廳，晚上都係拍烏蠅嘅，與本港酒店晚飯座無虛席嘅情況大大不同。香港人最鍾意食，又使得起錢，入酒店又好似高級一啲，令大街大巷上嘅食肆陷於競爭劣勢。中式酒樓晚上有幾多客？自己去幫襯過，都覺得好同情啫！