籌備超過10年，俗稱「大館」嘅前中區警署建築群活化項目大功告成，日前舉行開幕禮，特首林鄭月娥一向對保育工作十分上心，所以早前已經參觀咗呢個活化項目，亦出席開幕典禮支持一番，佢似乎對其中嘅燈光表演最感興奮，喺facebook圖文並茂話，「其中嘅燈光表演更令文物活起來，令人讚嘆」。
八方睇番娥特fb，發現當中有張相都好珍貴，就係警務處前處長李明逵、曾偉雄同現任一哥盧偉聰罕有同場，娥特形容大家難得聚首一堂，「見證呢個令人引以為傲嘅保育成果」。其實佔地1.36萬平方米嘅大館有3組法定古蹟，分別係前中區警署、中央裁判司署同域多利監獄，周二起分階段向市民開放，又會有光影匯演，市民若想參觀，就要透過大館網頁或手機App預約入場。