唔好怪小記見識少，原來連喺油麻地果欄做咗好多年嘅果欄老闆聰哥，都話從來未見過咁誇張嘅超級厚皮橙，咁但係我哋呢啲行外人，唔通買橙之前，要切開嚟睇吓先咩？
不過，聰哥話憑橙嘅外觀，其實已經可以分辨一個橙係厚皮定薄皮，仲知道係咪新鮮多汁㖭！即刻睇吓阿聰醒你嘅4大貼士！
（1）揀橙皮較光滑嘅橙，如果見到橙皮凹陷或者凹凸不平嘅橙就唔好買喇。
（2）記住揀色澤光鮮嘅橙，如果見到橙篤，即係連接樹枝部份嘅位置，過份拱起就唔好買。
（3）用手指篤一篤橙皮，靚橙嘅橙皮比較有彈性，被篤後，好快會回復原狀，劣橙嘅橙皮一般欠缺彈性。
（4）如果兩個橙嘅大小相若，就應該揀較重身嘅一個，因重身意味橙較新鮮多汁。
有專家就補充，如果想食多汁甜橙，可以買俗稱「黑牌橙」，不過就貴啲。黑牌橙係指每年3至5月出產嘅「石榴篤橙（NAVEL）」，佢哋經過成個冬天嘅成長，果肉會保留更多水份味道香甜。呢種橙嘅標籤多數係黑色，印有「LATE SEASON」字樣，所以業內都叫佢哋做黑牌橙。