郭富城前晚在鰂魚涌出席雜誌活動，一身西裝打扮兼留鬚的城城，原來是新片《六月的秘密》形象，城城表示留鬚造型令他不太舒服，好想剃鬚，而下個月父親節，他會在美國拍戲中度過。
《六月的秘密》講述一段父女情，戲中城城飾演內地演員苗苗的父親，城城說：「我哋要喺美國拍兩個月外景，部戲係向全天下嘅爸爸致敬，劇本好吸引，我做爸爸角色好多次，但今次就有個23歲嘅女。」
問到城城當了爸爸後，演爸爸角色會不會更投入？城城表示不一樣：「古仔講我係喺唐人街長大嘅點心師傅，拍攝前特登去學整點心，月餅、叉燒包我都識整。」問他老婆方媛（Moka）可有試食？城城說：「味道唔錯！不過佢未有機會試，我離開香港已經個幾月。」
「我有啲心悒」
早前母親節，Moka在微博公佈囡囡已經識叫媽媽，可是還未識叫爸爸，城城失落的說：「佢見到我個樣有少少驚，搞到我有啲心悒，因為我啲鬚嚇親佢，希望佢大個會明白，爸爸為電影離開一段日子，等佢大個會畀佢睇番呢部作品。」
採訪、攝影：黃曉妍
