遮打盃周日(27日)上演，以前稱為跑馬王，但近年戲碼不復當年，今季少至得五匹馬角逐，換言之有份過終點都有獎金收。
史無前例遮打盃有外隊馬參與，早兩星期前還期待有多匹外隊馬來港，可惜失望大過期望。如「巴基之星」勝出遮打盃，感覺上還有機會與「美麗傳承」爭奪香港馬王殊榮，但個人認為「美麗傳承」機會甚大，原本都有機會爭馬王的「馬克羅斯」因試閘不合格，無緣角逐遮打盃。
每逢大賽都採用A跑道，但今季此跑道偏差比較大，大家基本概念是全闊A跑道跑道有得追，但無論12月國際賽、3月中打吡日及4月尾冠軍賽馬日，清一色大利前置內疊馬，今次如要捉路，可能要到第五場才可作準，皆因頭場是新馬賽、第二場直路賽，第三場才可參考場地形勢，第四場三級賽就蝕分馬較多。
尾場第十一場二班1400米，可謂高水準賽事，多匹季內識贏演出準繩的馬匹，計評分範圍2號至14號馬只相差九分。「世界紀錄」季內上陣次數不多，六戰有五次入前四名，曾於同程1400米取勝，擊敗後來贏香港打吡的「平海福星」，路程演出穩定，若今次A跑道利後上的話，可作膽之選。
「世界紀錄」對手方面，「百步穿雲」近兩仗谷草全勝，亦早跑過沙田甚有追勢，1400米一戰受阻無騎，配合外地1400米有根據，此程無難度。冷門留意「鑲白旗」，初出一役出閘稍慢，末段沒有望空情況下湧上來，計路程未必正宗，但北半球馬體重有升無跌，算適應得快。