【港九情懷】【《蘋果》專訪】
寬敞的通道、微和的燈光、光滑的椅背，都是熟悉感覺。畢竟蓋鳴暉在被譽為「粵劇界紅館」的新光戲院演出超過27年，見證着這裏的變幻興衰，她接受《蘋果》訪問也選址於此，分享往事之餘，順道細味當中情懷：「新光等於我爸爸媽媽。好記得1990年10月11號，就係我第一台嘅演出，終於我嘅願望成真。」
採訪：陳杰、馮國康
當年蓋鳴暉在八和粵劇學院訓練根基、練毯子功，又不停踏台板演出，但人生第一次踩上「粵劇界紅館」難免膽怯，當時的景象，蓋鳴暉今日仍記憶猶新：「當時做《牡丹亭驚夢》，我喺虎道門等入場，揸住叠紙係咁震。但驚係冇用，就算點緊張都要記得晒歌詞、對白同埋舞台嘅走位，當然我係不負眾望嘅。」
鍾情舊舞台
新光戲院在北角區屹立四十多年，已是該區地標，每提起它便令人聯想到「睇大戲」。蓋鳴暉說：「有人話好舊，但我其實鍾意佢舊。舞台距離、大小，我直情合埋眼都行到！邊一忽有凹凸位，或者唔可以用力嘅，我都一清二楚。呢個係做演員嘅基本守則，咁你冇乜機會出錯。」伴隨着新光戲院的，還有不斷消逝的人情味，以前每有戲寶公演，街邊檔擺到成行成市。蓋鳴暉說：「我自己都試過啦！睇戲時揸條油炸鬼入嚟食，舊時嘅香港，呢度係好熱鬧。」
在很多有心人推動下，新光戲院前年續租至2022年，繼續履行其職責。問題是，粵劇能否傳承下去？蓋鳴暉的睇法是正面的：「有觀眾、有演員，就一定有人睇。只不過我成日祈求同業也好、資深演員也好、新人也好，都要認真去演。」亦因此，就算蓋鳴暉演出過無數次《帝女花》、《紫釵記》，但每次都會當新戲來演：「因為有機會睇戲係遊客嚟，你『hea』嘅話，唔好嘅訊息就會喺人哋腦海。」
全職有難度
近年政府都有推動粵劇發展，栽培新演員不遺餘力，蓋鳴暉認為粵劇演員一代比一代幸福：「以前我哋好珍惜每一次演出，仲要自己籌錢，揞錢出嚟蝕。𠵱家新人要乜嘢，政府會畀配套你，導師、服裝完全唔需要演員操心。你帶個軀殼、帶個腦返嚟就得。」然而，要投身做全職粵劇演員始終有難度，蓋鳴暉寄語後輩，要不停裝備自己和作出嘗試，待機會到時才有能力抓緊。
化妝：Chris Lam
髮型：Ahtin
場地提供：新光戲院大劇場