皇家馬德里同利物浦上周六喺基輔決戰歐聯之巔，賽前兩隊名宿先喺七人場「開戰」。皇馬由布達堅奴領軍，沙加度、卡路士、蘇加、米積杜域、卡林保、馬基列尼等名將助拳；紅軍就由魯殊帶隊，科拿、路爾斯加西亞、貝加、史米沙及占士等球星壓陣。最終皇馬元老隊9:3大勝利記元老隊，為皇馬先助聲威。
呢場元老賽上下半場各踢10分鐘，先後效力兩間球會嘅杜迪克、艾比路亞及麥馬拿文，似乎都有「立場」，前兩者選擇披上皇馬戰衣，麥馬拿文則代表利記出賽。開波四分鐘，較「忠心」嘅麥馬拿文射門中柱，路爾斯加西亞轉輾間補中幫紅軍元老領先；及後兩隊輸流發威，紅軍有加西亞入多粒，加上貝加建功，皇馬亦有馬基列尼起孖同甘比亞素入波，兩軍半場踢成3:3。不過，換邊後變成皇馬天下，米積杜域入兩球、蘇加演帽子戲法，加上馬基列尼入多粒，幫皇馬9:3大勝。皇馬元老隊贏波後就入咗決賽，同舒夫真高朋友隊對壘，結果踢成3:3，和氣收場。