【本報訊】由在媽媽的肚子裏起計，小鐵漢Kansas與爸媽相遇不過兩年，卻已經歷了多次生關死劫。媽媽Doris產檢時發現BB的心臟發育不全，醫生婉轉問「你有冇其他諗法？」「嗰陣都已經五個月，佢可以由咁細粒養到咁大，佢嘅生命力應該好強，所以冇諗過唔要。雖然都知會好辛苦啦。」自此一家三口不停出入醫院。小鐵漢現在已一歲零兩個月，很懂得使計攫取自己想要的，身軀瘦小，與蠱惑的靈魂不太相稱，手術疤痕更顯得粗獷。爸爸Jayco在自己的胸口紋上同樣的圖案，「我個仔條疤痕要孭住一世，我要教佢點面對。如果就咁用口講，佢會話：『你都冇，點知我點諗箒？』我想同佢擁有相同嘅嘢。」
記者：蔡慧敏
小鐵漢爸爸Jayco的紋身花了四小時、一次過完成，「其實我好怕痛。」小鐵漢的「紋身」現時縱跨半個身軀，長大後比例會縮短，爸爸的卻不會變，「父子裝」他日此消彼長，「想鼓勵佢、話佢知我哋成家人都支持佢。」女人卻天生比男人更能忍受痛楚，懷孕至三十四周，Doris出現早產迹象。小鐵漢一出世便要做手術，如果早產，那一刀恐怕更難捱，「入醫院瞓咗幾日，要禁食、吊鹽水，成個人都抽乾晒；打咗幾支強肺針，真係好痛好痛。」醫院半夜不時傳來病人的呻吟聲，令她更不安，「我同佢講，你千祈唔好咁快出嚟。」
10%機會率 手術成功
小鐵漢等到三十九周呱呱墮地，算是超額完成。真正臨盆時，Doris反而不覺得怎樣痛。但BB的情況比預計的更壞：左邊心比右邊大，心瓣也不齊全，令血液倒流。此時醫生又問：「其實佢都好嚴重。嗰時你都諗住生？」「要畀個機會佢爭取。」小鐵漢全身插滿喚管，靠呼吸機維持，出世時那6.3磅肉轉眼便消耗得肋骨盡現。第一次開腔手術效果卻不理想，要推倒重來，「醫生捉咗我哋入房度，傾咗一輪。佢話手術應該得10%機會成功，不如唔好要佢受一刀先離開，由佢就咁算吧。」Doris忍不住爆喊，但她和Jayco都不願放手，「始終10%都係機會。」
第二次手術成功，但傷口大得難以承受，小鐵漢對那張掛滿喉管的病床更是抗拒，「佢喺醫院係咁喊、冇笑過。要抱住佢行來行去，唔可以接近張床。結果係大人冇得瞓。」其間Doris每日來往天水圍的家和瑪麗醫院，身心俱疲難免胡思亂想。新手媽媽愛在WhatsApp群組圍爐取暖，但她受不了那種氣氛，「其他人send啲小朋友相出嚟，咁健康，咁得意。望住佢瞓喺醫院，就好唔開心。」惟有退場。「facebook都唔玩、朋友都唔想，因為冇心情。自己無啦啦喺街都會喊，情緒好唔穩定。」幸好Jayco是個高質的出氣袋，「畀佢鬧吓囉。發洩完就冇嘢。」
畀面媽媽 乖乖吞藥
到五個月大，小鐵漢終於回家，「初頭都好驚。又冇氧氣、又冇醫生護士，但習慣咗又冇想像中咁難，細心啲就OK。」BB每次要吃五、六種藥，肺壓、甲狀腺七國咁亂；藥丸要磨粉、開水，再注入針筒，逐一記錄，根本不能假手於人。兩口子有時也會為對方攪亂了針藥而爭拗。但小鐵漢總會畀面媽媽，由她餵藥，再苦也乖乖吞下，「我𠵱家變得好執着，一起身就要拖地，平時冇咁乾淨的。真係放低咗自己，咩都顧咗佢先。」又要趕在BB睡醒前泵奶，結果每天都看到日出。
小鐵漢兩個月前接受了第二階段的手術，預計到四歲再捱一刀，希望心臟功能屆時會回到正常水平，可以跟爸爸跑跳追逐。隨着小鐵漢長大，愛吃薯片的Jayco很快也不能在家大吃特吃。Doris今年仍未夠三十歲，年輕女孩忽然責任重大，下次旅行更不知要等到何時。「我又冇覺得自己唔好彩。BB揀爸爸媽媽係有原因，佢知我哋錫佢，先會揀我哋。」「佢只要健康就夠了，唔使特別聰明，亦唔使孝順我，哈哈。」
足本訪問請瀏覽： http://nextplus.nextmedia.com/news/spot/20180527/589735