佛誕放假，老友去咗泰國行開三日，左丁山就留在家中睇CNN、NBC、BBC、彭博等網絡政治經濟新聞，忽然間見到路透社一段新聞，講馬莎（Marks & Spencer）會從現在到2020年執埋100間分店以上，唔知係英國零售市場不景吖，還是全世界整個百貨公司行業步入寒冬。現時網購興起，亞馬遜橫掃美國，淘寶雄霸中國，歐洲好似冇呢啲網購巨無霸，但必然網購流行，好似馬莎呢類上世紀七八十年代嘅威水百貨公司，點會有好世界過吖，美國老牌百貨公司Sears早十年已陷入苦戰狀態咯。
睇緊BBC體育新聞，一間香港上市公司「國際娛樂IEC」（上市編號1009）會以二千二百萬鎊作價買入前英超球會韋根（現在乙組）之際，手機響起，來電者竟然係三藩市老友投資K，佢話星期一到港，星期三與太太去成都旅遊，問左丁山可否在中環飲下午茶，於是話俾佢聽：「今日係佛誕，放假一天，我在家hea緊，幾難去中環咯。」投資K嘆一聲：「乜香港有佛誕假期嘅咩？真不巧，咁就緣慳一面了！」世事往往如此，冇法啦，以後不知幾時再有機會與住在太平洋彼岸嘅投資K碰頭。
肥仔K又來電話佢地訂唔到下午茶，問左丁山有無辦法。訂邊間呀？肥仔K講到佢拍拖之時，要星期六朝早十點去Ritz-Carlton酒店之朱古力俱樂部（Chocolate Club）輪位飲下午茶，認真誇張，結婚之後，仲邊有咁神心吖，但今年年初就想起帶太太去重溫舊夢，點知朱古力俱樂部已經冇咗，改名為Ritz-Carlton Cafe，飲下午茶有大把位，價錢冇變，仍是兩人498元加一，但見到人客大減，昔日情景大變，於是以後都沒再去，幾日前聽到IFC有間四季菊日本餐廳，有日本式下午茶，逢星期六星期日下午三點到五點十五分就係茶點時間，點知一打電話去就被通知，爆晒，下回請早。於是來電叫左丁山幫忙，點幫呀，冇位就冇啦，但點解IFC有間四季菊？日本餐廳唔係叫做稻菊嘅咩？於是搵酒店C問吓，佢話IFC四季酒店4樓外之稻菊，已經改名為四季菊，尖東帝苑酒店之稻菊亦同時改稱四季菊，雖則改招牌，所有日本廚師及管理人士冇變。點解要改名呢，肥仔K從日本網得知，稻菊創辦人自從福島地震後，傷心冇咗佢鍾情嘅日本食材，索性停業，香港招牌就轉讓予一位香港商人。肥仔K話普天之下，大概只有日本人這麼執着！