中美貿易談判，看似打和，中國就話雙贏，官方放風，話守住三大談判底線──緩解貿易不平衡，拒絕美國指令性指標（即美國要求削減二千億美元貿易赤字），維護產業升級（即雙方不談中國製造2025），並無輸蝕。緩解貿易不平衡一項，中國會大力增加進口美國油氣，有助於改善中國能源安全，唔似得入口委內瑞拉或伊朗石油，經常擔驚受怕，既驚美國禁運，又怕對方生產供應不穩定，如現時嘅委內瑞拉，經濟崩潰，有冇能力生產與輸出原油，都有問題。
講守住中國三大底線，即係宣傳中國冇輸到，有面子。不過只講好嘢，瘀事就算唔提，都冚唔住火噃，中興通訊難道已成為孤兒仔，中央唔再理？
美國白宮首席經濟顧問庫德洛並非專業經濟學家，而係好紅嘅財經演員，以前CNBC嘅當紅節目主持人，故此講慣咗，比較大口，劉鶴一去到華盛頓，庫德洛就爆響口話中國同意削減貿易赤字二千億美元，好令中方尷尬，中國外交部發言人立即否認；劉鶴返回北京後，庫德洛（5月21日）接受CNBC舊同事訪問，講到ZTE（中興），就毫不掩藏咁講：「信我，中興唔會容易甩身（believe me, ZTE won't get off scot-free）」scot-free呢個片語比較少人講，古老英文scot係tax咁解，現在一般解作without being punished（不受懲罰）。又指向中興禁運晶片，係一個執法問題，與政治或中美貿易談判無關。但財政部長姆努欽透露，習近平與特朗普通電話，有為中興說項，特朗普在5月15日發Twitter直情指：「中興從美國買入大量零件，將在我們與中國貿易談判與及我和習主席的私人關係反映出來。」既然如此，姆努欽與庫德洛突然異口同聲，談及美國法治，中興係法律問題，如果唔係總統與閣員互扯貓尾，就係特朗普為咗向習近平交代，扮好人，下屬就表示恕難執行，直情係玩中國一鋪。
庫德洛雖然拋出美國法治來唱淡解除中興禁運，但也同時開出3大條件：中興須繳交大筆罰款、服從嚴厲合規舉措、更換董事會，全新管理團隊。習近平、劉鶴會否接受這樣的條件，犧牲現時的中興揸弗人呢？華爾街日報在5月22日報導，中美雙方正就此談判，具體詳情，或有突破了。政治不離背後交易，利益交換，中興已成為棋子，無法自主的了。