四大會計師樓一直以穩定晉升梯級為賣點，兩年初級核數員、三年高級核數員、三年經理、四年高級經理，然後便成為合夥人。這種平步青雲的道路相信每個商科生都聽過，但當然世事並不會如此盡如人意。如同其他大公司，Big4的架構亦是金字塔形，除了頭幾年外，要年年升職根本冇可能，因為上面都冇咁多位，但相對外面三五七年先升一次職，Big4嘅升職速度尚算快速，咁到底Big4係如何保持公司嘅階級流動性呢？
第一，就係Big4擁有超高嘅自然流失率，每年都有一批人自動離場，結果係能夠捱到升職樽頸位嘅人並唔多，甚至少到不足以構成樽頸位；第二，Big4雖然少炒人，但其實成日都有勸退發生，即係好聲好氣叫你自己走人，仲會送張Reference Letter過你，等你搵工唔使俾人知係被炒咁尷尬，如此一來又清一批瘀血；第三，就係畀勁多垃圾Job你做，等你自己頂唔順走人，呢招有時都會用嚟迫走啲中高層。
話雖如此，但Big4亦都面對緊一個流動性危機，就係合夥人嘅晉升機會。呢個主要係因為行業已經冇太大增長空間，冇咁多Job養班合夥人，冇錢自然冇得升職；另外，𠵱家好多合夥人都只不過係四五十歲，仲有排先退休，可見將來根本唔會空返個位出嚟。試問當公司最頂層都欠缺機會，下面只會更難升職，咁呢行最自豪嘅「良好晉升機會」又如何維持呢？
神仙丁
《審計搵丁》負責人
http://facebook.com/AuditSlave/
本欄逢周五刊出