幾時都話揸車同做人一樣，除咗要守規矩，仲要夠穩重，如果唔係就會瀨嘢。話說噚日朝早差不多6點，讀者鍾先生揸車途經灣仔告士打道，突然聽到巨響。鍾先生即刻望過去，發現一架貨櫃拖頭，上面有塊巨型鐵板跌咗落地，車上嘅鐵板都斜晒，側埋一邊。好彩車流唔算多，所以冇壓到其他車。但因為鐵板太大塊，足足有四米乘兩米，冇可能人手搬走，警方到場，即刻搵吊臂車到場，將鐵板吊番上拖頭，仲封鎖慢線處理。
小記八到，原來架拖頭當時沿灣仔告士打道東行去北角，但去到紅隧口前嘅上橋位，司機發現鐵板搖吓搖吓，於是停咗喺慢線與影線之間，之後一塊鐵板就墮地。警察封咗三條行車線，搞到大塞車，紅隧龍尾一度塞到4公里外嘅信德中心，打工仔同學生都多得佢唔少。