每逢區議會改選前夕，梗會有啲「又會咁啱得咁蹺」嘅怪事發生，2019年區選大戰前，亦有件事令人「不可思議」，而且仲關乎葉劉淑儀創立嘅新民黨事！地區消息話兩年一任、屬東區嘅「康城分區委員會」名單近日出爐，除咗相關選區嘅當區區議員，仲包括唔少民主派區議員嘅潛在對手，又估唔到委任人選嘅特區政府有咁驚人嘅「未卜先知」能力噃！好似新獲任者中包括新民黨郭浩景同劉聖雪，前者盛傳會挑戰太古城東嘅王振星，而2015年同麥明詩一齊選過港姐嘅劉聖雪就擬戰康山撼公民黨梁兆新，兩人都不時貼出同葉劉嘅落區相，睇嚟葉劉又幫到年輕人起機喇。
助新丁打通地區人脈
呢個康城分區委員會每年或只開三、四次會，卻極具戰略價值，因為警方、食環及康文等各方組織都會派員出席，發放地區最新資訊，而且當中有唔少分區阿頭，等委員識到相關話事人，造就呢班新丁委員，迅速「增廣見聞」。
有資深區議員話，呢啲委員會原本主要委任區內一啲法團、互委會等社區人士，以便與民選議員同地區官員加強交流，𠵱家卻成協助建制政黨同民主派打對台嘅組織，完全變質。
李八方