意外有時候好難避免，特別係老人家，屋企人同街坊都應該打醒精神，好似順利邨呢位老伯搭電梯跌親，好彩有保安員同街坊發現，幫手報警。
噚日中午12點幾，住喺秀茂坪順利邨嘅讀者黃先生行過商場，聽到有幾個人好大聲咁講嘢，黃生就即刻跑去睇吓發生咩事啦！點知就見到一位老伯，喺扶手電梯跌低咗，成個人打橫趴咗喺度，額頭撞咗埋梯級，伯伯當時喺電梯嘅中段位置，保安員即刻飛身按緊急掣，將電梯煞停，而伯伯隨身物品銀包、電話，就碌晒落地。街坊驚伯伯傷到骨頭，都唔敢扶起佢，惟有等救護員到場。救護員幫佢包紮後，抬上救護車送院。據聞伯伯乘搭扶手電梯，行到一半嗰陣突然頭暈暈，「阿伯突然好似腳軟暈低，跣咗一兩級」。好彩救護員嚟到之後，伯伯慢慢醒番。警方回應話，姓劉嘅80歲老伯被送到去聯合醫院治理。