話咁快暑假就到嘞，甜心一族會好唔得閒，全球最大型法國朱古力展「Salon du Chocolat」同埋烘焙嘉年華，7月6日起一連三天喺會展舉行。最特別係全港首創朱古力時裝show。朱古力食得又着得？真係估佢唔到！怡東酒店糕餅行政總廚Kevin話，因為體溫會將朱古力融化，難度好高，初步會用嚟做耳環或者朱古力手帶。行行吓肚餓，都可以食隻耳環頂肚，咪話唔過癮。
一公里無麩麵包成焦點
至於烘焙展就有唔少整餅工作坊選擇，好似有70年代最火嘅紅寶石餅店忌廉玫瑰蛋糕，現場示範所見，啲花唧出嚟後會慢慢自動開花，唔到你唔服。另外，最受小朋友歡迎相信係攞過裱花金獎嘅Jasmine姐姐教授新派裱花甜點。另一焦點係即場炮製全球最長、達一公里嘅無麩質麵包。主辦單位縱延展業行政總裁老旭華歡迎大人小朋一齊友嚟創造健力士紀錄。