雲爺爺接班人終於有定案喇！之前一直係大冷門、岩岩先俾巴黎聖日耳門（PSG）踢走嘅西班牙主帥艾馬利，成功打低雲格弟子韋拉、阿迪達等人，正式成為新廠長！英國《每日郵報》報道話，艾馬利以年薪500萬鎊（約5,200萬港元）同阿仙奴簽咗三年合約，雖然同「智利工程師」比歷連尼揸「槌」嘅千萬年薪爭咗成倍，不過有得接雲爺爺嘅棒，就搞到艾馬利自己都失晒魂，仲早過官網自爆做廠長！
早過官網公佈要刪po
阿仙奴喺英國時間周三朝早九點，宣佈球會進入「一個新開端、一個新時代、一個新篇章」歡迎新帥艾馬利，阿仙奴CEO加斯迪斯就大讚艾馬利，教波曾取得輝煌成就，又發掘出歐洲最優秀嘅青年才俊，而且艾馬利嘅進攻足球風格激動人心，同阿仙奴好夾，相信佢係帶領阿仙奴前進嘅理想人選咁話。艾馬利就話：「我好開心加入咗一間偉大嘅球會，阿仙奴嘅足球風格、着重培訓年輕球員、又擁有一個夢幻球場，球會嘅運作模式，喺世界上一直好出名同受到追捧。我好開心可以充當帶領阿仙奴開啟新一頁嘅人選，我期待為每一位鍾意阿仙奴嘅人，帶嚟特別嘅時刻同回憶！」
查實艾馬利禮拜二晚未正式入廠，似乎已興奮過龍，喺自己嘅個人網站突然發佈咗張自己同阿仙奴嘅合成相，張相上面唔單止有阿仙奴嘅隊徽，隊徽下面仲寫住「好榮幸可以成為阿仙奴大家庭嘅一分子」，而且背景仲係阿仙奴主場阿聯酋球場。不過冇幾耐佢嘅個人網站，就變成咗「404 Not Found」上唔番，或者艾馬利知衰太早涉密，咪急急腳刪post囉。
或帶埋PSG愛徒過檔
英國《天空體育》就報道，艾馬利入廠前已率先落柯打，要留住同球會仲有一年合約嘅中場艾朗藍斯，事關佢要將藍斯同前鋒奧巴美揚，塑造成自己戰術嘅雙核心；另外亦有傳艾馬利將會招攬部份嫡系愛徒入廠幫拖，其中曾與艾馬利喺西維爾合作嘅中場悍將尼桑斯，有望解決槍手唔夠硬淨嘅弊病，隨時成為艾馬利嘅第一獵物，PSG球員達斯拿同拉比奧特，亦有機會隨艾帥轉戰英超。奪帥失敗嘅前槍手阿迪達，就有傳佢會同曼城續多兩年約，繼續留係藍月亮做助教靜候機會囉！