全國政協常委唐英年早前出席活動時，將復旦大學嘅校訓掉轉嚟讀，惹嚟讀錯校訓嘅指摘，雖然有復旦校友其後力撐唐唐冇讀錯，但似呢股讀錯旋風，席捲立法會！金融服務界立法會議員張華峰噚日喺立法會特首質詢時間提問時，竟然兩次將「大灣區」講成「大亞灣」。咦，佢係全國政協委員嚟㗎喎，點解咁都講錯㗎？
新聞處助「篡改」答問稿
查實肥老闆呢，噚日全程都係揸住張「貓紙」發問，同林鄭冇乜眼神接觸，一開始就話：「特首，我留意到你就香港如何參與大亞灣規劃方面，曾經提到香港可以作為國際金融中心同埋全球最大離岸人民幣業務中心……」
政肥老闆至此唔知讀錯，繼續一輪嘴繼續讀，點知之後再錯多一鑊，「（香港）可以喺國際資產、資金管理、風險管理、融資方面，協助推動大亞灣嘅金融發展……」但一如當日出席唐唐活動嘅復旦校友咁，林鄭冇當場指正，仲自行糾正為「大灣區規劃」，而政府新聞處其後發出嘅行政長官質詢答問稿，就自行將張華峰提問中讀錯嘅「大亞灣」一律變為「大灣區」，連議員發言歷史都「篡改」埋。
肥老闆其實唔係首次講錯嘢，雖然位於深圳嘅大亞灣都喺大灣區入面，之不過連習總極重視嘅大灣區都噏錯，又確實離譜咗啲，尤其佢仲係政協委員，唔係應該比一般人對呢個規劃，更上心、更敏感㗎咩？
李八方