世界盃即將開鑼，博彩公司紛紛開出32隊參賽隊伍奪標賠率，巴西、德國、西班牙、阿根廷同法國多數被視為5大熱門，投資銀行瑞銀早前聘請18位分析師，好似預測股市走勢咁，用精密電腦經過專業分析，撰寫詳細世界盃報告，當中得出「神級」結果，意大利今屆奪冠機會為1.6%，同主辦國俄羅斯一樣，但重點係：意大利根本喺外圍賽已出局，有乜可能奪冠？
撰寫報告嘅主管喺前言話，希望呢份報告有助大家作出相關嘅投資決定，係咪令人好驚奇？但報告中都有一段提到，好多球隊未能打入決賽周，當中最令人可惜嘅係意大利，因為意大利係4屆冠軍云云，又話要向意大利致敬，但呢段文字解釋被質疑可能係後期加入「補鑊」，唔少網民諷刺話「點解無北韓？」、「佢寫下次啊！」