呢排社運界多咗個「田灣女孩」，事事以田灣出發嘅人原來係早前突然退出香港眾志嘅袁嘉蔚（Tiffany），佢最近開咗個人專頁，仲發表題為〈田灣 不應該如此〉嘅文章，獲眾志前黨友黃之鋒同羅冠聰等人share，更落hashtag「田灣女孩」，其中之鋒除咗喺留言同畀心心，再hashtag埋「心蔚田灣，撐田灣女孩」，仲搞笑咁採納網民建議，話袁嘉蔚日後開地辦，可以叫做「蔚袁堂」！咦，有傳Tiffany會戰明年區選，似乎出戰之意，相當明顯！
Tiffany指近萬人居住嘅田灣邨，商場只剩便利店同提款機，田灣外更有條長命斜，令老弱傷殘甚至成年人由山腳走到屋邨亦相當辛苦，原因係領展入主後商場冇民生商舖，連升降機早排都被停止服務，形容呢個係「領展的惡果」。
佢繼而解構呢個領展惡果係源於社區錯誤規劃，呼籲田灣居民同佢一齊爭取安居同宜居嘅家，咁擔任當區議員，又確實係爭取社區變得更好嘅好方法，而現時呢區區議員、建制派陳富明，上屆係自動當選喎，唔知準備好要競選未？